10.9 C
Tuzi
Wednesday, February 21, 2024

Dukaj me ambasadorën e SHBA-së: Forcimi i bashkëpunimit në fushën e sigurisë kibernetike dhe digjitalizimit

Ministri i Administratës Publike, Marash Dukaj, ka takuar sot ambasadoren e Shteteve të Bashkuara të Amerikës në Mal të Zi, Judy Reising Reinke, të cilën e ka falënderuar për mbështetjen e dhënë nga SHBA-të pas sulmit kibernetik në infrastrukturën e qeverisë, si dhe asistencën e ekspertëve në krijimin e mekanizmave për mbrojtje më të përshtatshme kibernetike në rast të një sulmi të ri kibernetik me nivel të lartë të sofistikimit. 

Ai e informoi ambasadoren me prioritetet e Ministrisë së Administratës Publike, forcimin e sigurisë kibernetike, reformën e administratës publike dhe decentralizimin e vetëqeverisjes lokale, me ligjet, si dhe vazhdimin e procesit të transformimit digjital dhe rritjen në numrin e shërbimeve elektronike të destinuara për qytetarët dhe ekonominë. 

“Prioriteti ynë është sigurimi i hapësirës kibernetike malazeze në përputhje me standardet e avancuara të vendeve anëtare të NATO-s dhe Bashkimit Evropian”, tha ministri Dukaj. 

Ambasadorja Rajnke shprehu vendosmërinë e SHBA-së për të vazhduar mbështetjen e proceseve reformuese në Mal të Zi, veçanërisht në fushën e përmirësimit të sistemit të sigurisë kibernetike. 

“Ne jemi shumë të interesuar për intensifikimin e bashkëpunimit në fushën e sigurisë kibernetike dhe digjitalizimit të shërbimeve publike, sepse këto janë fusha shumë të rëndësishme për vetë qytetarët”, tha Rajnke. 

Ajo tha se SHBA-të janë të gatshme të ndihmojnë procesin e reformës së administratës publike në Mal të Zi, siç ka qenë deri më tani, dhe se në periudhën e ardhshme duhet të përcaktohen fushat e bashkëpunimit, si dhe vuri në dukje përvojat e SHBA-së në përmirësimin e cilësisë së shërbimeve publike dhe përmirësimin e administratës publike nëpërmjet modernizimit dhe inovacionit. 

Ambasadorja Rajnke dhe ministri Dukaj konstatuan se dy vendet kanë marrëdhënie të shkëlqyera ndërshtetërore dhe se ka potenciale të mëdha për zhvillimin e mëtejshëm të bashkëpunimit dhe aplikimin e përvojave, veçanërisht në procesin e sigurisë kibernetike dhe digjitalizimit. 

Gjatë bisedës konstruktive u theksua veçanërisht nevoja për ndërmarrjen e aktiviteteve të nevojshme dhe organizimin e takimeve operative për arritjen e produktivitetit dhe efikasitetit më të madh në digjitalizimin e administratës publike dhe në fushën e sigurisë kibernetike.

Lajmet e fundit
Related news