Deputetët e partive shqiptare në Kuvendin e Malit të Zi janë deklaruar unanimisht kundër ligjit për ratifikimin e Marrëveshjes mes Qeverisë së Malit të Zi dhe Qeverisë së Emirateve të Bashkuara Arabe për bashkëpunim ekonomik.
Ilir Çapuni nga Aleanca Shqiptare theksoi se kjo marrëveshje rrezikon perspektivën evropiane të Malit të Zi dhe minon besimin te Qeveria. Ai kritikoi mungesën e respektimit të parimeve të decentralizimit dhe shpërfilljen e qëndrimeve të pushteteve lokale. “Politikat ditore dhe interesat e ngushta janë nxitësit kryesorë të këtyre marrëveshjeve. Nuk është vetëm Ulqini që po revoltohet, por i gjithë Mali i Zi për shkak të nxitim dhe jokompetencës,” tha Çapuni. Ai kërkoi të ndërpritet seancën për të harmonizuar qëndrimet me përfaqësuesit e Qeverisë, duke iu referuar Ligjit për të Drejtat dhe Liritë e Pakicave.
Artan Çobi deklaroi se Forumi Shqiptar nuk do të votojë për këto ligje, duke theksuar se Ulqini është denigruar dhe abuzuar në media për interesa të individëve. “Na kanë vënë në situatë të zgjedhim nëse jemi për apo kundër Ulqinit. Forumi Shqiptar nuk ka dilema: gjithmonë do të mbështesim Ulqinin dhe zërin e qytetarëve,” tha Çobi. Ai kundërshton ndërtimin e banesave, duke shtuar se kjo nuk do të mbrojë Ulqinin. “Qytetit tonë i nevojitet rritje dhe zhvillim, por jo në mënyrën që kundërshtohet nga qytetarët. Ne jemi për një marrëveshje të qartë dhe transparente,” shtoi ai.
Nikollë Camaj nga Forumi Shqiptar Nënkryetari tha se çështja e Ulqinit po trajtohet me nxitim dhe pa kompromis. “Askush nuk është kundër investimeve, por toka u përket edhe brezave të ardhshëm. Duhet të ecim përpara, por duke lënë diçka për të ardhmen,” tha ai. Camaj kritikoi plaçkitjen e Ulqinit nga “Morsko Dobro” për vite me radhë, për të cilën është heshtur. “Jam kundër ndërtimit të banesave, betonizimit që nuk është në harmoni me natyrën dhe çdo ndërtimi pa vullnetin dhe interesin e komunitetit lokal. Forumi Shqiptar është në krah të kolegëve nga Ulqini,” tha ai.
Mehmed Zenka, deputeti i Unionit Demokratik të Shqiptarëve e quajti situatën “operacion në tru pa anestezi”. Ai tha se qytetarët e Ulqinit po fajësohen padrejtësisht për ngritjen e çështjes së Plazhit të Madh. Zenka shprehu mosbesim te Qeveria, duke pyetur se kush do të mbrojë qytetarët nëse u merret toka. “Kjo Qeveri nuk mund të dijë cilat do të jenë interesat e qytetarëve në të ardhmen,” përfundoi ai.
