Deçiqi vazhdon me përforcimin e skuadrës për sezonin e ri të Ligës së Parë të Futbollit të Malit të Zi, e cila nis zyrtarisht nesër.
Përforcimi më i ri i klubit nga Tuzi është braziliani Majkon, i cili vjen në Arena Besa me synimin për të rritur konkurrencën në repartin ofensiv.
Bëhet fjalë për një futbollist 22-vjeçar, i gjatë 185 centimetra, që luan kryesisht në pozitën e sulmuesit qendror. Ardhja e tij është pjesë e procesit të kompletimit të skuadrës së drejtuar nga trajneri Ivan Brnoviq para nisjes së kampionatit të ri.
Deçiqi ndeshjen e parë të sezonit do ta zhvillojë të dielën në Besa Arena, ku do të përballet me Arsenalin e Tivatit.
